Польшча ў Беларусі

У гэту хвіліну свет стаіць перад абліччам пагрозы здароўю ў небывалых маштабах. Вірус COVID-19 актыўна распаўсюджваецца, колькасць людзей, якія заразіліся, і колькасць памерлых расце вельмі хутка. Як у развітых, так і ў менш развітых краінах сістэма аховы здароўя, эканоміка і штодзённае жыццё сутыкнуліся з выпрабаваннямі.

 

Незалежна ад эканамічнага становішча краіны наступствы пандэміі найбольш адчуваюць самыя бездапаможныя людзі. Асабліва людзі сталага ўзросту і людзі з хранічнымі хваробамі, а таксама людзі, у якіх няма доступу да належнай медыцынскай дапамогі, і людзі, якія жывуць у зонах канфліктаў.

 

Каб зменшыць распаўсюджанне інфекцыі, пазбегнуць новых заражэнняў і выратаваць жыццё, неабходна прыняць сумесныя нацыянальныя і міжнародныя меры. 23 сакавіка 2020 года генеральны сакратар ААН Антоніу Гутэрэш заклікаў да глабальнага перамір'я: “Давайце натхняцца ўтворанымі саюзамі і дыялогам паміж рознымі бакамі – паступова ён набывае форму, каб распрацаваць агульны падыход да віруса COVID-19, але мы павінны зрабіць значна больш. Давайце скончым войны і пераможам хваробу, якая знішчае наш свет”.

 

Пандэмія COVID-19 стварыла чарговыя выклікі і гуманітарныя патрэбы ў гэтай вельмі складанай аператыўнай сітуацыі. Таму 25 сакавіка 2020 года Арганізацыя Аб’яднаных Нацый распачала рэалізацыю глабальных мер гуманітарнага рэагавання і выдзеліла 2 млрд долараў ЗША на барацьбу з вірусам.

 

26 сакавіка 2020 года адбылася міжнародная відэаканферэнцыя на высокім узроўні, якой пакіраваў Марк Локак, намеснік генеральнага сакратара па гуманітарных пытаннях і каардынатар надзвычайнай дапамогі, а таксама доктар Майк Раян, выканаўчы дырэктар праграмы Сусветнай арганізацыі аховы здароўя па надзвычайных сітуацыях (Executive Director Health Emergencies Programme WHO). Удзельнікі канферэнцыі падкрэслілі сур’ёзнасць сітуацыі, а таксама неабходнасць агульнай і хуткай рэакцыі. Марк Локак сказаў: “Калі б мы пакінулі самыя бедныя і безабаронныя краіны на волю лёсу, гэта было б занадта жорстка і неразважліва. Калі б мы пакінулі каранавірус, каб ён свабодна распаўсюджваўся ў гэтых месцах, мы прымусілі б рызыкаваць мільёны людзей, цэлыя рэгіёны патанулі б у хаосе, а вірус атрымаў бы магчымасць распаўсюджвацца па ўсім свеце”. Многія ахвяравальнікі звярталі ўвагу на неабходнасць скарэкціраваць планы на 2020 год з улікам магчымасці іх здзяйснення і новых патрэб. Удзельнікі канферэнцыі падкрэслілі адносна грошай, вызначаных на барацьбу з пандэміяй, што гэта дадатковыя сродкі, без памяншэння раней размеркаваных сродкаў, у першую чаргу на гуманітарную дапамогу і для груп, якім найбольш пагражае заражэнне вірусам.

 

Па запрашэнні арганізатараў у відэаканферэнцыі прыняў удзел Павел Яблонскі, намеснік міністра замежных спраў Польшчы. Польшча заняла актыўную пазіцыю перад абліччам выпрабаванняў. “Мы не забываем пра краіны, якія знаходзяцца ў складанай гуманітарнай сітуацыі і найбольш патрабуюць дапамогі ў барацьбе з пандэміяй COVID-19”, – сказаў Яблонскі. У адказ на заклік Упраўлення па каардынацыі гуманітарных пытанняў Польшча падтрымала Цэнтральны фонд рэагавання на надзвычайныя сітуацыі і добраахвотна перадала фонду суму ў памеры 1 млн злотых, пра што паведаміў намеснік міністра замежных спраў Яблонскі падчас тэлеканферэнцыі з Упраўленнем па каардынацыі гуманітарных пытанняў і Сусветнай арганізацыяй аховы здароўя. Гэтыя сродкі былі афіцыйна прынятыя 26 сакавіка 2020 года як дадатковы польскі ўзнос на абмежаванне наступстваў пандэміі COVID-19. Гэта праяўленне салідарнасці Польшчы як надзейнага і паслядоўнага ахвяравальніка ў структурах Упраўлення па каардынацыі гуманітарных пытанняў.

 

Сродкі Цэнтральнага фонда рэагавання на надзвычайныя сітуацыі, выдзеленыя на барацьбу з пандэміяй, будуць скіраваны між іншым на дастаўку неабходнага лабараторнага абсталявання для правядзення тэстаў на каранавірус і медыцынскага абсталявання для лячэння людзей, устаноўку кранаў, дзякуючы якім можна будзе мыць рукі ў лагерах і сялібах, а таксама на правядзенне інфармацыйных кампаній на тэму, як абараніць сябе і іншых ад віруса.