Польшча ў Беларусі

„Сёння, як і ў мінулым годзе, мы павінны былі сустрэцца на канцэрце ў Вялікім тэатры ў Мінску, павінны былі слухаць музыку Войцеха Кіляра ў выкананні беларускага аркестра пад кіраўніцтвам польскага дырыжора Паўла Котлі”, – сказаў на пачатку Пасол Артур Міхальскі. „Аднак паколькі ўсе мы аказаліся ў вельмі складанай сітуацыі пандэміі каранавіруса, з думкай пра здароўе нашых гасцей, мы былі вымушаны адмяніць канцэрт, тым не менш я рады, што нягледзячы ні на што сёння мы сустракаемся, няхай сабе і віртуальна”, – сказаў Пасол. „Чаму мы святкуем прыняцце канстытуцыі, якая дзейнічала такі кароткі час? Таму што дух канстытуцыі, прагрэсіўныя для ХVIII ст. ідэі, якія яна ўтрымлівала, сталі для нас, палякаў, адной з крыніц натхнення для захавання нашага імкнення да свабоды на працягу доўгіх гадоў няволі”, – нагадаў у сваім выступленні Пасол. „Нягледзячы на тое, што прыняцце Канстытуцыі 3 мая з’яўляецца нацыянальным святам толькі ў Польшчы, гэта спадчына, спадчына першага ў Еўропе дакумента такога тыпу і другога ў свеце пасля амерыканскай канстытуцыі, слушна належыць усім нам – нашчадкам народаў Першай Рэчы Паспалітай, г.зн. і літоўцам, і беларусам, украінцам і габрэям, татарам і армянам”, – падкрэсліў Артур Міхальскі.

„Канстытуцыя 1791 г. была прагрэсіўнай і ўнікальнай для Еўропы і права таго часу. Яна афіцыйна належыць да сусветнай і еўрапейскай спадчыны. Як і для Беларусі, шлях Польшчы да суверэнітэту быў працяглым і складаным”, – сказаў у сваім выступленні намеснік міністра замежных спраў Беларусі Алег Краўчанка. „Нашы краіны знаходзяцца ў самым цэнтры Еўропы. Польшча не толькі важны, уплывовы член Еўрапейскага саюза, але і наш сусед, адзін з буйнейшых эканамічных партнёраў Беларусі. Нас аб’ядноўваюць сумесныя гісторыя, культура, спадчына. Нас таксама аб’ядноўвае агульная адказнасць за бяспеку і стабільнасць у рэгіёне, за бяспеку і дабрабыт нашых грамадзян”, – падкрэсліў Краўчанка.

Святкаванне 229-й гадавіны прыняцця Канстытуцыі ўпрыгожыла выступленне народнага артыста Беларусі, акцёра Тэатра імя Янкі Купалы ў Мінску Аляксандра Падабеда, які прачытаў фрагмент Канстытуцыі 3 мая ў перакладзе на беларускую мову.

Сардэчна запрашаем паглядзець запіс віртуальнага святкавання 229-й гадавіны прыняцця Канстытуцыі 3 мая.